Sugih Korupsi

Sugih Korupsi Kaputingannya Guring Di Terali besi

Sugih Mengajut Urang Kampung Abut

Oleh:

Muhammad Murjani                                                                                                                              

Panderan Di atas Rakit

Wayah ini mun handak sugih banyak banar caranya, kada masti jadi pagawai ataua pajabat gin, bisa haja sugih. Napang gerang arti sugih tu? Naaaah ia am, ikam nih betakunkah ataua mauji aku? Aku ni batakun karana aku kada tahu, mun aku tahu beapa aku betakun., bararti aku kada tahu to bila aku batakun.......he..he..he...

Dua Janda Detektif kampung

Ujar Ijum bepander lawan Ipah.... Pah.. ikam tahu lah lawan urang nang bediam di parak masjid tu, ada klo nang rumahnya sing ganalan, nang ada kulam ranangnya di atas? Tahu ai ujar Ipah manjawab, rumah si anu..siapa neh..heh..asa di ujung ilat nih ngarannya nih siapa lah..sambil maingatakan si Ipah, sambil manyikati tapasan di atas rakit nang bahanyut maumpati landasnya banyu. Nang sudah bahanyut mulai kampung ulu sampai kahilir di kampung Tinggiran hanyutnya, lalu baikat kapinggir di kampung Tinggiran ngaran kampungnya. Jadi Ipah sudah ingat ngarannya, itu  Bos Ajid,  urang jawa simarang ujar Ipah. Sugih banarlah ujar Ijum pulang bepander sambil mengisiki awaknya nang lagi asyik mandi bakisik lawan tapih didanya. Iih ujar Ipah, apa ikam Jum ai di atas rumahnya tu haja salain ada kulam ranang tu, ada lapangan minton jua ujar Ipah pulang manambahiakan. Iih... ialah? ujar Ijum betakun? Ujar kanakan jua pang ujar Ipah, tahuam lagi bujur kadanya. Kanyamannyalah urang kaya kaitu hidupnya ujar Ijum, makan nyaman, guring maginnya ai di tilam sapiringbid, bini talu ikung ha pulang, pina munyak lawan nang tuha lawan nang anum, pina tulai lawan nang anum, lawan nang hanyar, nang kaya pa lah urang kaya itu begawinya maka sugihnya liwar bilang saraba ada, ujar Ijum sambil mangisik pinggulunya lawan tapih tilasan mandinya, sambil basingkai tapih nang kalihatan batang pahanya nang mancarunung lawan mulus langkarnya. Ujar Ipah lg, ku ada mandangar kesah Jum ai, ujar urang jua pang, Bos Ajid tu lain urang kampung kita asli klo? Ujar Ipah sambil betakun, inya tu jar ada baisi ilmu pangajian sugih, nang duit nih bisa datang surangan karumahnya, haaah ujar Ijum sambil mamasang tapih nang karing basalin ampih mandi. Kajian sugih nang kaya apa Pah kesahnya maksud ikam tuuuh? ujar Ijum batakun lagi. Ujar habar bubuhan acil Yanti anu,,,apa nih..? kajian nang ngapa bilanya keluar malam tu bisa barubah jadi babi tuuh, ooo ngeped? Ujar Ijum pulang sambil manyambat sambil batakun, naaaah ia itu,,ngeped, iiih ialah Pah..? asa nya ah klo, surang kada malihat pang, jadi kada wani jua mamadahkan bujur kadanya, lain jaka mata surang nang malihat langsung, Iih Ujar Ijum.

Sampai dikampung Tinggiran, Ijum ampih mandi lalu masuk kadalam lampauan rakitnya, rancananaya handak babaju, imbahnya naik ke kampung Tinggiran handak badadai jua lawan handak tahu kampung Tinggiran itu nang kaya apa garang kaadaannya. Tuntung ba aksi badandan, bamik ap , bapupur, bagincu, patuk pina mahabang, tulis kaning pina mamanting, rambut baurai kariting, baju kantat salawar singkat satangah lintuhut, ba ayak bajalan di kampung Tinggiran lawan bunel nang kaya Ayu ting-ting. Mantap Ijum bepanampilan lawan tas sabuting nag di dalam tasnya itu baisi Hindphun. lawan dumpit wadah duit wan ATMnya.

Nang ngaran urang kampung Tinggiran tadih, imbah malihat Ijum naik bajalan handak ke pasar Sajumput di kampung Tinggiran itu, buhan pamudaan nang dudukan di palabuhan tuuh umaaaa ae tapalengor pinggulu maitihi si Ijum aja bajalan, napang Ijum bajalan ba ayak nang kaya artis si Ayu Ting-ting haja lagi. Nang ngaran pamudaan ninih ia ja kakiyauan, uuu ding-uuding, tapi ah,,, nang ngaran Ijum nih jua cucuk dikiyau urang tuh kada tatahu lalu, haur maatur burit aja yang diayakkannya, cam mapa kada tapalingur kapala urang di ulahnya. Hibat kam Ijum niiih.

Imbah tuhuk sudah bajalanan Ijum bulik handak karakit pulang, malanjutakan parjalanannya. Sampai karakit, rakitnya tarus bahanyut, akhirnya sampai di kampung Kuin ataua Sungai Kuin, nang bangaran wayah ini Kuin Pasar Tarapung. Sasampai di kampung Kuin, Ijum lawan Ipah niih bepander lawan acil Syiah, ujar ijum barapa Cil pian batukar rakit harga wayah ini? Jadi ujar acil Syiah ku kada manukar dahulu, paringku masih banyak, mun handak ikam tawarkan kalain haja dahulu, atau wadah amang Ijai, tuuh paling amang Ijai manukarai!! ujar acil Syiah sambil mainstruksikan. Jadi ujar acil Syiah pulang bapander, barapa garang ikam handak bajual rakit ikam niiih? Ujar Ijum pian aja harga barapa grang handak manukari,jadi jar acil Syiah tujuh ratus ribu kaya apa? Lapan ratus tuuh cil ae ujar Ijum, nah kya ini aja ujar acil Syiah tujuh satangah aja, mun ikam hakun ku saitu aja wani nukari akan, jadi jar Ijum ayu ja Cil ai bayari. Imbah itu Ijum lawan Ipah maambil duit harga rakitnya, habis itu langsung maambil puntalannya handak bulikan kakampungnya.terpisah dari itu.

Bulik Kakampung Halaman

Ijum dan Ipah bulikan kakampungnya naik taxi jurusan kadaerah pahuluan kampung kalahirannya. Sampai di kampungnya Ijum lawan Ipah bapanderan pulang di rumahnya. Ipah lawan Ijum ni sarumah, kaluarga baiparan. Jadi takumpul tarus. Lalu badua neneh bapanderan pulang manyambung kesah nang dirakit tadih, kesah urang jawa simarang nang sugih, Bos Ajid nang manurut kesah mangaji pasugihan ngepet. Ujar Ijum, Pah..ikam haurkah? Kada, ujar Ipah. Aku Pah ai panasaran nah, kaya apa kolo kita malam ni runda, bajagaan,,, handak tahu banarai, bujur kadanya di kampung kita nih ada urang nang mangaji ngepit. Jadi jar ipah, ikam tahulah waktu ritualnya tuh jam barapa? Biasanya kulu nang kaya film di TV tuh rajin, malam pang jam 12 an, ujar Ijum. Ialah, ujar Ipah. Iiih Ujar Ijum pulang. Ayua ai mun kaya itu, ujar Ipah.

Bagadangan Karana Panasaran

Waktu jam tarus barlalu, malam sudah handak parak jam 12an, Ipah lawan Ijum manyiapakan sangu gasan handak mahintipakan apa nang diulah si bos Ajid nang sugih nento lawan bininya dirumah nang migah nento. Ipah lawan Ijum bajalan bapakaian saraba hirang, batuping hirang, lalu basambunyi padang kadap kada jauh lawan rumahnya si bos Ajid nang paling sugih nang baisi bini talu ikung bungas-bungas wan langkarnya nento.

Kalu malihat kasugihan Bos Ajid nih kada sadikitan duitnya pang, napang  tanah, di pulau Kalimantan ni haja, di kandangan ada, lahan sawit disitu, di Paringin baisi tanah takana tambang batu bara, di Batulicin tambang Boxit disitu jua, mubil Marsidis talu buah, mubil BMW nang mudil tarbaru, maginnya ae sapida mutur nang dipakai buhan anak-anaknya nang larang, sapida mutur sport nang kaya ampun buhan valintino rusi. Kada gagampangan liwar sugihnya bus Ajid nih sekalinya, perusahaan paliwood di Irian ada, di Papua, di Kaltim, di Kalbar, di NNT ia haja, kadada habisnya duitnya nento, sampai tujuh turunan mamakani kada bakahabisan harta wan duit-duitnya nento.

Lalu Ipah wan Ijum basiap-siap sudah handak mahintipakan  wan handak masuk kadalam rumahnya bus Ajid nang dipadahakan urang mangaji ngepid tadi, karana jam sudah pukul dua balasan kurang lima manit. Sakali Ijum wan Ipah mahintipakan, di sala kaca jandila nang kain hurdennya taransaparan. Jadi nang ngaran Ipah wan Ijum nih asik-asik mahintipakan, sekalinya napa nang diitihinya? Sakalinya Bus Ajid tadi asik bapagutan lawan bininya nang katiga, nang bangaran Ijah Cantil. Pas haratan Bus Ajid asik-asik pisit bapagutan, maka kada babaju badadua pulang, hanya pakai salawar handap haja, sakalinya napa,,,? Pas haratan asik nento, bill rumahnya babunyi, kalingongan, Bus Ajid kada tahu bahwa di lantai bawah  ada bill babunyi, lalu nang anaknya bangaran Fibri mambukai lawang, sakali dibukai sakalinya napa, buhan panyidik KPK nang bapakaian saraba hirang datangan manggaladah rumahnya bus Ajid, sakali patugas KPK mambuka lawang tangah, kusung, bukai lawang kamar dapurnya kusung, imbah patugas KPK nang lain naik kalantai atas, sakalinya pas tabuka lawang kamarnya bus Ajid nang di dalamnya tadih bus Ajid lagi asik-asik bapagut lawan bini nang katiganya, nang haratan kada sing bajuan, lalu bus Ajid tadih kada kawa lagi bukah, kaputingannya dibawa buhan KPK kaluar rumh, langsung dibuat kamubil KPK nang sudah mahadangi di higa masjid baparkir. Naaaah habis itu Ijum wan Ipah takajut malihat, sakalinya buhan KPK nang datang manangkap bus Ajid tadi, sakalinya bus Ajid itu adalah Buronan KPK Pelaku Tindak Pidana Pencucian Uang.

“Sapandai-pandainya Tupai Malumpat, Akhirnya Tagugur Jua”; “Sapandai-pandainya koruptor kakap basandiwara, Kaputingannya Tatangkap Jua”

Mohon maaf jika ada kesamaan nama dalam penulisan ini, tidak ada maksud untuk menyinggung, melainkan hanyalah sekedar ilusi dari penulis saja.

Penulis: muhammad Murjani                                                                                                                                                                  Mahasiswa STIH Sultan Adam Banjarmsin                                                                                                                               Email:murjaniombudsman910@gmail.com////muhammadmurjani910@yahoo.com